sahrā se aane vaalī havāoñ meñ ret hai
hijrat karūñgā gaañv se gaañv meñ ret hai
ai qais tere dasht ko itnī duā.eñ diiñ
kuchh bhī nahīñ hai merī duāoñ meñ ret hai
sahrā se ho ke baaġh meñ aayā huuñ sair ko
hāthoñ meñ phuul haiñ mire paañv meñ ret hai
muddat se merī aañkh meñ ik ḳhvāb hai muqīm
paanī meñ peḌ peḌ kī chhāñv meñ ret hai
mujh sā koī faqīr nahīñ hai ki jis ke paas
kashkol ret kā hai sadāoñ meñ ret hai
Leave a Comment